Hans Söllner

Bloß a Gschicht

Kurz vor Weihnachten is gwesn, 97 und des erste Moi san se olle Menschn auf deara Wöid einig gwen und ham se entschlossn dass zammramman und gehn. Mia olle ham erkannt dass de Wöid Gott is und dass ohne Gott koa Wöid gem kon, mia ham erkannt dass ma unwichtig san und uns nimme vamehrn derfan.

Im Somma 98 is des letzte Kind auf d' Wöid kemma und von Tibet bis nach Bad Tölz, von Zagreb bis Honduras is koa Frau mehr schwanga worn und mia ham ogfangt des ma wieda Afrikana wern. 2008 war da jüngste Mensch auf deara Wöid 10 und zu dem Zeitpunkt hods scho koane Schwangaschaftsuntersuchungen und koane Kindagärtn mea gem, koane behindertn Kinda san mea auf d' Wöid kemma und koane Schreie aus Brutkästn von kloane süchtige Lebewesn warn mea zum hean.

Koa Kindamißhandlung und koane Teppiche san mea knüpft worn in Indien. Mia warn mit Auframma beschäftigt und ham de Zeit vergessn. 2028 war da jüngste Mensch auf deara Wöid 30 und es hot koane Obdachlosn und Penna mea gem, koan sexuelln Mißbrauch von Kinda und auf da ganzen Wöid koane Kriege mea, koane Slums und koane Lehrstöin, moane Tiertransporte und Öltanka san mea gfahrn.

De Wöid werd Afrika hamma gsogt und ham weida aufgrammt. 30 Johr späda war da jüngste Mensch 60 und es hod nu 15 Millionen Menschn gem auf da Wöid. Koane Landratsämta und koa Polizei, koane Gfängnisse und koane Morde. Olle hod ois gheat und ganze Städte warn laar. Politika und Pfaffn, koane Deala und Diebe, koan Krebs und koa Aids.

Es hod nu 500000 Menschn gem auf deara Wöid und da Jüngste war 70. Koa Brandrodung und koan Strassnbau, koa Altersheim und koa Krankenhaus war mea do, koane Vasicherungen und koa Rentn, koane Lügna und koane Reichn und koane Arma hods mea gem.

Numoi 30 Johr späda is a oida Mo von seiner Hausbank aufgstandn und er hod gspüat das a da Letzte es auf deara Wöid und dass fertig worn san mim auframma. Er is zum letztn Moi durch sei Haus ganga und sein Gartn und wia ois sauba war hod a se aufn Hoamweg gmacht. Er hod da Letzte sei derfa und er is ganga wia a Großa, s Land war weiß und da Mond hod zuagnomma an seim Dog und er is Richtung Südn zogn. Da Wöid war stad und a Sonn is audganga wiara okemma is am Meer. Er hod se nimma umgschaut und is langsam aussegschwumma, koa Hass war in eam, koa Neid, koa Zorn, koane Sorgn und koa Leid hods mea gem auf deara Wöid.

Er is aussegeschomma da Sonn hintaher und er war alloa. Er war da Letzte und er hod koan Wal mea troffa auf seim Weg hoam. So samma eines Tages olle vor Eam gstandn und Er war gerührt und hod Tränen ghabt in de Augn weil a erkannt hod das ma olle seine Söhne und Töchta san, Schwestern und Briada. Und mia, ja mia san durch unsa Geh des worn, wos ma mit Bleibm nia werdn hädn kinna.
Väta und Mütta
Afrikana und Afrikanerinnen
Jah Rastafar I
Gott
Afrika


Text von Hans Söllner
aus dem Booklet zur CD "A Jeda"



Ein paar Bilda